Sa Corti de sa cassatzioni at burrau sa “misura cautelare” po Càralu Sanjust de Casteddu chi ariseru faci a is seti de a merì est torrau a essi un’òmini lìberu. Custa sentèntzia burrat s’ordinàntzia de Giuanni Pàulu Casula, su Gip de su tribunali de Casteddu, de su cincu de friàrgiu de ocannu. Su consilleri iat giai torrau una perra de su dinai pigau de su fundu de su grupu regionali de su Pdl. Su matessi est acontèssiu puru po Sìsìnniu Piras de Biddexidru chi no depit prus abarrai in domu.
Po cantu spetat a Santjust, funt stètius Càralu Amat e Frantziscu Maròngiu, is abogaus de issu, a ndi pediri su scancellamentu de is domiciliaris. Cumenti eus giai nau, su ex consilleri at giai arrestituidu sa mitadi de su dinai gastau po còmporas personalis e po sa coja cosa sua. Po cantu spetat a Piras, imbeci, issu puru nd’at torrau su dinai: su imperau po is cumbènnius e su chi iat donau po una collaboratzioni. Po imoi, Màriu Diana sceti abarrat a is domiciliaris. Intzandus, parit dearerus chi sa Procura de Casteddu apat detzìdiu de fai pategiai is onorèvolis chi ant cumentzau a torrai su dinai.
Càralu Mulas
