In su bixinau de sa Marina in Casteddu, is giustinus de sa Scuadra Bolanti ant postu is ferrus a duus òminis chi bendiant droga me in s’arruga: a su primu ddi nanta E.V., tenit 21 annus e albanesu est; a su segundu ddi nanta M.G., tenit 25 annus e de Casteddu est.
Sa polima fiat scruculliendi su bixinau, chi una borta ddi narànt Lapola, e at cucau is dus giòvunus chi teniant un’etu de porrus. A is pulotus ddus ant tzerriaus is chi in su bixinau nci bivint, stracus de s’andatzu lègiu e de su stragatzu chi nd’arribàt de s’arruga.
A cantu parit, candu is giustinus funt arribaus, ariseru a meigama, su casteddaju at provau a fai a sciri a su gopai chi sa giustìtzia fiat ingunis ma no nc’est arrennèsciu. Aici ddus anti cumpudaus e anti agatau s’arroba, su dinai gorangiau de is bèndidas e unu tira-buciconis.
