Sàbadu colau duus òminis de Biddesorris fiant furendi aràngiu in unu terrenu de unu tziu de otant’annus in su Buscu de Muristenis. Candu giai nd’iant prenu seti cascitas, est a nai prus de centu chilus de aràngiu, is carabineris de Partiolla e de Muristenis ddus anti cucaus e postus in casantza.
Is duus òminis, biendi is giustinus, po primu cosa si funti cuaus a palas de calincuna mata, duncas ant nau a is carabineris chi no fiant furendi ma chi iant tentu su permissu de nd’arregolli s’aràngiu de su meri de su frageri e totu. Ma sigumenti fàula fiat, ddis ant postu is ferrus.
A is duus furonis ddus anti cundennaus oi: a su primu dd’anti donau duus mesis e binti diis, a su segundu cuatru mesis. In prus, ant a depi pagai una gabella de duxentus francus nous.
Càralu Mulas
