Acàpius cun 87 aereostatzionis, chi funt 24 in Itàlia, 52 in Europa e 11 a foras de s’Unioni Europea. Custus is nùmerus chi ant a serbiri a sa Sardìnnia custu istiu po ndi betiri turistus. A fai connosci is donaus funt stètius Màssimu Dejana, s’assessori a is Trasportus, e Frantziscu Morandi, s’assessori a su Turismu, chi oi ant apariciau una cunferèntzia ‘e imprenta a pitzus de custu tema de grandu importu po s’economia sarda.
Su stadu su prus acapiau a sa Sardìnnia, sa Germània est: 14 logus diferentis dda acàpiant a is tres aerostatzionis sardas: Casteddu, Salighera e Terranova. Po cantu spetat a is donaus a pitzus de is cumpangias aèrias, Ryanair sa primu est po nùmeru de arrotas, chi funt 50. Sighit Meridiana cun 30, ma sa cumpangia de s’Aga Khan est sa prus de importu po cantu spetat is nùmerus de is bòlidus: 259 faci a is 219 de is irlandesus.
