Mèrcuris su doxi de martzu s’ant a fai sciri sa lista de is cunsilleris arregionalis nous? Podit essi, ma seguru no esti. Comuncas, su chi parit seguru est chi anche sa Corti d’apellu de Casteddu funt acanta de dda acabai cun is cuntrollus me in is ischedas e in is verbalis de sa circoscritzioni de Tàtari. Sceti acabada custa faina at a essi possibili a connosci is nòminis de is cunsilleris sceberaus.
In su mentras is partidus de tzentru-mancu chi ant bintu is eletzionis sìghint a circai de si ponni de acòrdiu po ndi bogai a pillu sa giunta arregionali chi at a gubernai sa Sardigna imparis a Frantziscu Pìgliaru. Ariseru, is ànimas chi formant su Partidu Demogràtigu si funt atobiadas po chistionai de cadiras e assessoradus, ca is minoràntzias puru bolint essi parti de su gubernu nou, deghinò, anti nau, ant a sutenni a Pìgliaru “de foras”.
Po cantu spètat a s’atòbiu intr”e Pigliaru e is meris de su PD, no si scit ancoras nudda. E nudda puru si scit a pitzus de is assessoris sceberaus de su presidenti e de is partidus.
