“Una pariga de diis de àcua e nuis, ma giai a cumentzai de custu mèrcuris, in s’Itàlia de goissu e in is ìsulas, at a arribai su beranu. Custu gràtzias a un’anticicroni chi, prus o mancu po una cida, s’at a donai unu paghixeddu de basca”.
A fai is prebisionis, Frantziscu Nucera est, su meteròlogu chi traballat po su giassu web 3bmeteo.com. Narat su spertu chi fintzas a martis s’Itàlia at a essi cumenti segada in duas perras: in sa banda de susu nci at a essi tempus bonu, po mori de sa pressioni arta de is Azorras; mentras in sa banda de bàsciu nci at a essi tempus lègiu, cun sbentuladas e àiri friscu chi nd’arribat in deretura de is Balcanus.
Martis su tempus bonu at a abarrai in s’Itàlia de su nord, su lègiu in sa de su sud. Ma mèrcuris, cumenti eus giai nau, un’incìngiu de beranu at arribai anche seus nosu puru.
