Efis, studenti disabili de Macumere, unu campioni de “cursa campestri” est. Mancai in Aristanis, in su mes”e friàrgiu de ocannu, apat bintu sa gara regionali de sa setzioni cosa sua (tenit sexi annus), no dd’ant fatu partiri po Grussetu, in Tuscana, po pigai parti a is campionaus italianus.
Su Comitadu paralìmpigu sardu ddi at fatu sciri chi po issu no nc’est logu. Custu poita ca po is garas finalis is logus funt pagus. Aici no dd’anti bòfiu. Ma issu podiat po fintzas binci sa gara ca est forti meda e custu ddu naràt sempri a is gopais.
Màssimu De Pau, su dirigidori de sa scola aundi andat su piciocu, chi est su Istitudu tènnigu “Satta”, arrennegau est. “No fait. No scint nemancu su mali chi funt faendi a su piciocu chi depit pagai una curpa chi no est sa sua, ma de is apariciadoris de s’atòbiu. Sa chèsia cosa mia at a sighiri cun una lìtera chi apu a scriri a su Comitau”.
