“S’ìsula de is turris. Giuanni Lilliu e sa tzivilidadi nuràgiga”: custu su nòmini de s’amosta apariciada de sa Supraintendèntzia de Casteddu e Aristanis, cun s’agiudu de su comunu de Casteddu, e nàscia po contai a sa genti sa mannesa e s’importu de sa curtura de is nuraxis. S’incìngiu de s’amosta at a essi sàbudu su 15 de Martzu, a is sesi de a merì, anche sa “Tzitadedda de is museus”, in pratza ‘e s’Arsenali, chi s’agatat in su bixinau de Casteddu ‘e susu.
In Casteddu, at a essi possibili a abisitai s’amosta fintzas a Cabudanni. A pustis, in su mes”e Donniassantu (Sant’Andria) s’atòbiu curturali at a lompi in sa capitali de s’Itàlia, me in is aposentus de su Museu Preistòrigu Natzionali Etnogràfigu “Luigi Pigorini” e at a abarrai ingunis fintzas a su mes”e martzu de su 2015.
Cuatru is setzionis: una generali, una po “su metallu”, una po “s’àcua” e un’atra po “sa perda”. Is cosas chi ant essi amostadas arribant de is museus sardus, ma po fintzas de cuddus terramannesus. Meda puru s’arroba noa chi nd’arribat in deretura de is ùrtimu sgavus e de is sercuestrus.
“A s’acabu, a pustis de 35 annus un’amosta de importu torrat a chistionai de sa tzivilidadi de is nuraghes – at nau Marcu Eduardu Minoja, su supraintendenti de Casteddu e Aristanis – e fai connosci una grandu curtura mediterrània e unu pòpulu antigu chi s’est arrelatau cun àteras tzivilidadis che sa fenìcia, s’arega e s’etrusca. Duncas, un’atòbiu de spantu, bellu e raru”.
“Pagu e nudda si scit de custu pòpulu, po su prus in Itàlia – at aciuntu Maria Assunta Lorrai, sa dirigidora de su dipartimentu po s’amparu de sa cultura e de su logu – ma s’amosta tenit s’iscopu de amentai a su grandu archeòlogu de Barùmini, òmini de gabali“.
