A sa Finàntzia is contus de Filipu Càndio, su campioni de poker casteddaju, no praxint meda. Po custa arrexoni dd’ant scritu in s’arregistru de is indagaus anche sa Procura de sa repùbriga de Casteddu. Is finantzieris nanta chi su giòvunu, chi s’allumìngiu suu est Drive on, no at pagau is gabellas. Po custu funt scruculliendi is bìncidas millionarias cosa suas.
Giai duus annus fai su spertu de poxer tessanu fiat acabau in s’arretza de sa polima fiscali imparis a bintixincu personis connotas meda in Sardigna, che Marcu Carta, su cantadori e artista pirresu, e Joaquìn Larrivey, su giocadori de fùbalu de su Casteddu.
Sa busca prus bècia chi est acapiada a sa de oindì serbit a is giustinus po cumprendi si Filipu Càndio depit torrai dinai a s’Istadu italianu. Comuncas, de una pariga de annus, issu “bivit” in su Printzipau de Mònagu e duncas sa busca s’est fata difìtzili meda dearerus.