S’assòtziu “Archeologia militare”, cun s’agiudu de su Anmi, at apariciau un’amosta a pitzus de is tzregas de is sordaus. Dd’ant a fai su 22 e su 23 de su mes”e martzu, anche su gumbentu de is caputzinus chi s’agatat in s’arruga de sa Brigada tataresa, in Cuartu Sant’Aleni.
S’atòbiu istòrigu-curturali tenit sa tenta de amentai a sa genti is sordaus cuartesus chi ant gherrau e funt mortus po sa pàtria in sa primu e in sa segunda gherra mondiali. S’intrada est lìbera e s’amosta est oberta de is 9 de a mengianu a mesudì e mesu, e de is tres e mesu a is seti de a merì.
In custa duas dies at a essi possibili a biri tzregas bècias de su sègulu colau, ogetus antigus, modellus de mèdius militaris e, gràtzias a s’giudu de sa genti, po fintzas is fotografias de is sordaus cuartesus. In prus, gràtzias a s’impìnniu e a is buscas fatas de is assòtzius Agorà Sardegna e AssFort Sardegna at a essi possibili a scruculliai dogumentus de grandu importu po cumprendi mellus e cumenti is personis biviant tandu.
“Cumbidaus is tzitadinus – ant nau is apariciadoris – a pigai parti a cust’atòbiu, mancai puru mandendi-sì is fotografias antigas de cancunu familiari a montura de sordau. Is màginis depint tenni un’arresolutzioni mìnima de 600 dpi. Su bivimentu litrònigu nostru est: archeologiamilitare@gmail.com”.
