Ainnantis anti strobau a unu tziu bèciu de otant’annus e a pustis ant arropau a unu stràngiu. Est acontèssiu in sa pratza ‘e Giacu Matteotti, est a nai in sa chi s’agatat faci a sa statzioni de is postalis, a sa de is trenus e a su palàtziu munitzipali in Casteddu. Unu logu chi iat a depi essi s’aposentu bonu de sa tzitadi ma chi a bortas est logu de balordus e gàgius.
Custa borta nci funt passaus unu tziu e unu stràngiu. A su primu dd’ant postu cantzoni e dd’anti pigau in giru ca fiat bèciu. A su segundu dd’anti pigau sa balixa e dd’ant tzacau una surra de cropus puru. A fai custas bellas cosas una truma de giòvunus, sesi po nai sa beridadi, chi tenint intre”e is sexi e is dexot’annus.
A tzerriai a is giustinus, sa genti chi fiat ingunis e totu. Diaici sa polima, gràtzias a is testimòngius chi ant biu su chi fiat sutzèdiu, funt arrennèscius a pigai is ses arropadoris chi ddus ant denuntziaus.
