Aciocau torra unu sciaferru de su Ctm, sa cumpangia de trasportus casteddaja. Est acontèssiu in su purman de sa lìnia Tre. Su ghiadori s’est difèndiu cun unu estintori ma dd’ant dèpiu arricoverai su pròpiu ca fiat feriu. A ndi torrai sceda sa Orsa Autoferro, su sindacau de categoria.
“Est ora de dda acabai – at nau Luisu Melis, su segretàriu de su sindacau in sa meria de Casteddu – ca sa cosa tennològica no serbit a firmai is balordus chi sighint a aciocai is traballadoris. Imoi tocat a ponni giustinus aintru de is purman. Po custu eus prus bortas pediu s’agiudu de su Prefetu chi, po imoi, no s’at ancoras arrespùndiu”.
