Nci at a essi puru Robert J. Aumann, prèmiu Nobel po s’Economia, su 5 de làmpadas a is 9 de a merì anche su tiatru tzìvigu de Casteddu ‘e susu po chistionai a ingìriu de Games people play. La natura della razionalità e il grande coreografo.
Custu, difatis, su tìtulu de s’atòbiu a incuru de Armando Massarenti, su filòsofu chi ghiat sa màngara intregada a sa scèntzia e a sa filosofia e chi bessit su domìnigu in su suprementu de su Sole 24 Ore, e de Vittorio Pelligra, su buscadori de Economia polìtiga de s’Universidadi de Casteddu.
Ma su primu atòbiu ufitziali de “Leggendo Metropolitano” at a essi custu merì a is 7 oras in su Bastioni de Santa Creu cun Playing brain imparis a Edoardo Boncinelli, su fìsigu e genetistu de grandu fama. In su matessi giassu, ma a is 8 e mesu de a merì, nci ant a essi Giocare e curarsi con i libri cun Davide Ruffinengo, su libreri bagamundu, e Ella Berthoud e Susan Elderkin is chi ant fraigau unu serbìtziu de biblioterapia anche sa School of life de Londras.
“Leggendo Metropolitano” at a sighiri prus a trigadiu puru cun àterus atòbius: a is 10 in su Bastioni de Sanremì cun Michele Serra e Michele De Mieri; a is 11 anche su tiatru tzìvigu cun Francesco Cataluccio.
