Is de su Presidio piazza Trento (Presìdiu de pratz”e Trentu) s’ant a atobiai torra ananti a su palàtziu de sa giunta arregionali po si chesciai torra. S’atòbiu est po custu mèrcuris chi benit, est a nai su 23 de su mes”e abrili, a is dexi de a mengianu. Sa manifestada, apariciada imparis a su Movimento Sardegna Pulita, s’Assòtziu Consumadoris Sardigna, su Comitato ScuolaCittà e sa Confederazione Sindacale Sarda, serbit po tzerriai cun fortza “chi inquina paga”, est a nai “chini atoscat pagat”.
Custa chèscia est cumentzada su 12 martzu colau in su bastioni de Casteddu. Is assòtzius pedint a sa Regioni s’inghìtziu de is obras de limpiadura e bonìfica de is logus impestaus (siant industrialis o militaris), imparis a su fraigu de polìticas sèrias po sa saludi de totus. In prus, pedint puru chi sa giustìtzia sigat a castigai is chi ant atoscau is logus.
Sa Sardigna est sa primu arregioni in Itàlia po sa mannària de su territòriu apestau: 445 mila ètarus, prus is giassus aundi nci funt is polìgunus e aundi faint esercitatzioni is sordaus de mesu mundu.
Po ndi sciri de prus tocat a castiai su giassu web de su Presìdiu.
