At a essi sàbadu s’otu de martzu a is dexi e mesu de a mengianu, in pratza de Santu Càralu (oi Pratza Yenne) in Casteddu, s’atòbiu po si chesciai cuntra su sìndigu de sa tzitadi, Màssimu Zedda, chi bolit fraigai un’aparcamentu nou a suta de is murus antigus chi s’agatant a suta de is bastionis de Santa Creu. Sa manifestada dd’at apariciada Italia Nostra, s’assòtziu curturali e ambientali chi lutat po s’amparu de is benis istòrigus, artìstigus e ambientalis in totu s’Itàlia.
A nai sa beridadi, atrus assòtzius, che su GIG (Grupu de Interbentu Giurìdigu), ant nau chi funt prontus a gherrai cuntra custu progetu strantaxau de s’aministratzioni cumunali chi bolit fraigai un’aparcamentu a prus pranus a suta de is murus antigus de Casteddu ‘e susu, est a nai is chi ddu stèsiant de Stampaxi.
Sa cosa chi no praxit de prus est su fatu chi tocat a ndi sciusciai una parti de custus murus antigus. Perou su sìndigu narat chi tocat a ddu fai po tramudai a Casteddu ‘e susu in unu bixinau pedonali e sentz”e màchinas.
