Faina mala meda ariseru ‘e noti in Barì, aundi anti postu fogu in sa seu de sa Cosir, s’assòtziu de traballu de Casteddu chi tenit s’incàrrigu de arregolli e manigiai s’àliga. Is framas ant destruiu duus càmionis Iveco e una màchina disaligadora. Duus furgonis, imbecis, funt stètius sarbaus de is obreris de sa dita, chi su dipòsidu s’agatat in Santa Susanna.
A sturai su fogu funt arribaus is pompieris de Trotolì e Lanusé, imparis a is carabineris de Barì chi funt scruculliendi is telecàmeras de seguresa de su logu. A cantu parit, is fainadoris ant impreau benzina po donai fogu a is màchinas. Un’atru atentadu a fogu, duncas, in sa meria de Nùgoro: difatis, su 23 de friàrgiu imoi colau, iant postu fogu a un’atra impresa chi arregollit s’àliga, est a nai a sa Dasty in Onne.
