Fiat acanta a s’incasillai sa primu sètzida de su stamentu arregionali nou, oi etotu in Casteddu. Custu poita aintru de su palàtziu a sprigus de s’arruga ‘e Arromas Bainzu Sale, su cunsilleri indipendentista de iRS intrau imparis a sa truma de Pìgliaru e de su tzentru-manca, at traculau meda candu depiat giurai di essi fideli a sa Repùbrica italiana.
Sa cosa est acontèssia candu nc’est stètia sa “pregunta de fidelidadi”, est a nai unu de is àutus chi is cunsilleris depint fai a marolla po intrai a fai parti de su stamentu autònomu sardu. Totus. Po fintzas chi at decrarau gherra a su Stadu italianu che Bainzu Sale, su meri de su partidu indipendentista chi bolit strantaxai una Repùbrica totu sarda.
E duncas, candu a Sale dd’anti preguntau de arrespundi “careja” issu at traculau i est partu pagu seguru, sentz’arrespundi. Su spantu perou est passau a sa lestra ca su meri de iRS a s’acabu, a pustis de un’atzùrridu ghetau de Màriu Floris, su presidenti po oi sceti de su stamentu, at giurau di essi fideli po fintzas a sa Repùbrica italiana.
