Su 23 de abrili de su 2005, a is otu e bintiseti de a merì, Jawed Karim càrrigat in YouTube su primu “tubu”, est a nai su primu bìdiu: binti segundus, prus o mancu, deananti a una càbia de liofantis anche su Zoo de Santu Diegu, in Amèriga. S’incìngiu de su giassu web po carrigai e spartziri bìdiuis in dònnia arrenconi de su mundu est.
A nai sa beridadi, YouTube fiat nàsciu in su mes’‘e friàrgiu, sempri in su 2005, gràtzias a tres amigus chi traballànt imparis po PayPal: Chad Hurley, Steve Chan e Jawed Karim etotu. Su giassu web praxit meda a sa genti e in pagu tempus tenit giai unu sciacu mannu de account de personis chi càrrigant bìdius de dònnia spètzia.
Intr’‘e is bìdius carrigaus nci funt puru film e trasmissionis de sa telebisioni: est a nai, cosa chi, segundu sa lei, sa genti no tenit is deretus de pubricai. Po custu, in su 2006 giai, sa NBC pedit a YouTube de ndi bogai is firminus proibidus. Ma YouTube iat cumentzau a ndi bessiri sempri prus connota e apretziada de sa genti. Cosa chi, sa NBC, cumprendit a sa lestra. Diaici lassat perdi abogaus e tribunalis po nd’aguantai un’acòrdiu istòrigu cun YouTube: sa telebisioni at cumprèndiu chi su web at a essi sempri prus forti in su tempus benidori.
E difatis, in su mes’‘e ladàmini de su 2006, Google còmporat YouTube chi, nanta is donaus istadìstigus, oi est su de tres giassus web prus castiaus e umperaus in su mundu, a palas de Google e de FaceBook sceti.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
