De cenàbura su 10 a domìnigu su 12 de su mes’‘e maju, anch’est su Open Campus de Tiscali in Sa Illeta, nci at a essi su primu Startup Weekeend de Casteddu. Un’atòbiu de importu, apariciau de sa Kauffman Foundation, chi serbit po donai fortza a is bideas de business prus mellus chi nci funt.
Gràtzias a cust’atòbiu, is chi tenint unu progetu de balori, ant a tenni su prexu mannu de amostai sa bidea insoru a un giuria de genti scìpia che Renato Soru, su meri de Tiscali; Mario Mariani, su criadori de The Net Value; Massimiliano Magrini, su manager de United Ventures; Niccol Sanarico chi traballat anche dPixel; Marco Duò, su dirigidori de su IED de Casteddu; Carlalberto Guglielminotti de Capital Partners.
Ma cali funt is prèmius po is mellus bideas de custa chi, a s’acabu, una gara de bideas esti? Intzandus, cuatru nci ndi funti: su Prèmiu Startup Digital Media; su Mind the Bridge; su IED Casteddu Special Prize; su Sardegna 2.0 Special Prize.
Is chi pigant su Startup Digital Media ant a binci unu mesi de tutorship anche The Net Value de Casteddu e tres mesis de GoLive. Is chi ant a essi scioberaus po su Mind the Bridge Prize ant a tenni sa possibilidadi de andai a Santu Frantziscu de s’Amèriga po connosci de acanta e ita bolit nai essi una Startup in guddei. Su prèmiu de IED Casteddu at a essi unu voucher de milli francus po sighiri cursus o master. Mentras su Sardegna 2.0 est su prèmiu chi permit de sighiri sentz’‘e gastus unu cursu de Social Media Marketing.
Càralu Mulas
