“Apu domandau di essi ascurtau ca ddi bolemu contai de su chi est acontèssiu in custa dies in su tiatru”. Custu su chi at nau Màssimu Zedda, su sìndigu de Casteddu, chi ariseru, faci a is cincu e mesu de a merì, at atobiau a Giuanni Giacu Pilia, su magistrau de sa Procura casteddaja. Imparis a su sìndigu, is abogaus Giosepi Macciotta e Fàbiu Pili.
Zedda at chistionau de “agiorronamentus” ma no at aciuntu unu fueddu de prus. E duncas no fait a sciri su chi at contau a su magistrau. Comuncas, arregordaus chi a issu dd’ant acusau de “abusu de ufìtziu” in s’acuntèssia de sa nòmina de Marcella Crivellenti a meri de su tiatru lìrigu e sa bogada de Giòrgiu Baggiani de sa càrriga de cunsilleri de s’aministratzioni. Oi a meri de su tiatru nc’est Màuru Meli chi nci ddu ant postu su 27 de su mese de gennàrgiu colau.
