Po chini tenit unu Kindle, est a nai su eReader Amazon po ligi is eBook, scioberai is librus novus est fàtzili meda, ca abastat a ddus comporai e scarrigai in deretura de s’arretza. Po cantu spetat a is librus litrònigus nous, de calincuna die est pronta sa bersioni in lìngua italiana de Inferno, s’ùrtumu arromanzu de Dan Brown chi est bolau a su primu postu de sa crassìfiga de is librus prus bèndius in totu su mundu. Po chini no stimat meda is thriller de su scridori ameriganu, intzandus podit ligi s’arromanzu de Grégoire Delacourt chi ddi nant Le cose che non ho: unu libru scritu beni meda chi fait praxeri a ddu ligi.
Po chini est unu ligidori chi ddi praxint de prus is sàbius, intzandus podit scarrigai Zero Zero Zero, s’ùrtimu traballu de Roberto Saviano chi chistionat de cocaina e de totu su mundu chi no si bit acapiau a custa droga chi parit sempri prus aintru a su mundu chi biveus dònnia die e chi, difatis, no bieus e no cumprendeus. Bellu meda est puru su sàbiu Parliamo di musica, scritu de su musigheri Stefano Bollani chi est unu biaxu aintru su mundu stravanau de sa mùsiga.
Si, po sorti, seis amantiosus de sa literadura de Sardìnnia, de cussa chi “no tenit tempus” e chi est unu scusòrgiu mannu po totus is sardus, intzandus si podeis ligi a su mancu dus librus: Il muto di Gallura de Enrico Costa e Fiabe e leggende sarde de Grazia Deledda. Dus eBook de grandu ermosura chi ndi bogant a pillu contus antigus de una terra stravanada che sa nostra.
Caràlu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
