A pustis de is cràstulus a pitzus de sa bessida de sbersioni pitichedda de su Galaxy S4, sa Samsung at scioberau su logu chi ant a fai conosci a sa genti de totu su mundu su “smartphoneddu” nou coreanu. S’atòbiu at a essi in Londras, ma no scieus candu. De seguru, ant nau is de sa Samsung, nci at a essi una presentada stravanada aundi ant a essi amostaus unus cantu modellus de device nous. Intr’‘e custus, su “Galaxeddu”, est a nai su smartphone Galaxy S4 piticheddu chi, a nai sa beridadi, nisciunu ndi connoscit sa bisura.
A parti custu, su smartphoneddu coreanu nou at a tenni unu schermu de 4,3 pòddixis, una càmera po tzacai fotus e bìdius de 8.0 megapixel a palas) e un’atra de 1.9 ananti, e at a tenni su sistema Android. Po cantu spetat a su dinai de bogai a fora de sa buciaca po ddu comporai, de seguru scieus chi at a essi prus baratu de su frari mannu (chi benit prus o mancu setexentus francus), ca su prètziu at a essi faci a is cuatruxentus/cuatruxentucincuanta francus.
Ma sa Apple puru at detzidiu de criai unu smartphone piticheddu: est a nai una bersioni “mini” de su iPhone chi, nanta, at a bessiri ocannu etotu. Custu poita ca is de sa “mela mussiada” no bolint lassai custu arrogu de su mercau mondiali a sa Samsung e a is telefoneddus sàbius chi umperant a-d Android. Una filosofia, sa de bendi device prus piticus e prus baratus, chi at premiau e at a sighiri a premiai a sa fràbiga criada de Steve Jobs.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
