Su 4G no est ancoras arribau in totu is logus e no ddu imperant totu is telefoneddus chi Samsung est traballendi a pitzus de una tennologia nova meda chi at a arrevolutzionai su mundu benidori po cantu spetat a is smartphone. Ddi nanta “Array Transceiver” sa tènnica stravanada chi permitit de umperai undas a frecuèntzia arta meda po arribai a una belocidadi de acàpiu prus lestra de 1Gb po segundu.
Nd’at torrau sceda sa Samsung etotu in-d una nova chi ant pubricau in su giassu web Samsung Tomorrow, aundi nanta chi is ingennieris funt traballendi cun is undas EHF, est a nai Extremely High Frequencies, chi funt undas arràdius chi tenint una frecuèntzia intr’‘e 30 e 300 GHz. Sa tenta est sa de produsiri, giai in s’annu 2020, un’arretza lìbera po totus e device lestrus che guetus. Difatis, gràtzias a custa tennologia noa, at a essi possibili scarrigai unu film in “grandu definitzioni” in unu o duus segundus sceti.
De custa manera sa domu fraigadora sud-coreana sighit a essi sa prus adelantada in su mundu, gràtzias a sa busca scentìfiga chi in sa natzioni asiàtiga de importu mannu esti. Bastat a pentzai puru chi, in-d una pariga de annus, sa Samsung nd’est bessia a primu fràbiga de tennologia mòbili de su mundu, lassendi-sì a palas po fintzas a sa Apple.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
