Est arribau po fintzas in Itàlia su Kindle Fire HD 8,9’’, su tablet mannu de Amazon, su prus bèndiu in Amèriga. Custu device tenit unu schermu prus mannu de is atrus Kindle Fire, e tenit puru una grandu arresolutzioni, cosas chi ddu faint stravanau po naigai in s’arretza, scarrigai e umperai is app, giogai cun is bìdiu-giogus, castiai pelliculas e fotografias, ligi lìburus litrònigus, e àteras cosas puru.
Su Kindle Fire nou, de anantis, una bìdiu-càmera HD portat, chi serbit po tzacai fotografias e fai bìdiu-tzerriadas cun Skype. In prus tenit duas antennas Wi-Fi dual band chi ddi permitit de s’acapiai a sa lestra a internet.
De custa manera sa famìllia Kindle s’amànniat, in Itàlia puru, e is tablet Amazon parrint dearerus is cuncurrentis prus perigolosus po su iPad chi, po imoi, s’urrei de is tablet abarrat. Ma Kindle no bolit nai sceti tablet, ma eReader puru. E difatis, su ligidori de librus litrònigus prus spainau in su mundu est. In Itàlia, duus funt is modellus chi fait a comporai: su Kindle classic e su Kindle Paperwhite.
Su Kindle classic tenit unu schermu de 6 pòddixis a tinta litròniga chi permitit de ligi is eBook sentz’‘e afatigai is ogus. Sigumenti su schermu “no touch” est, po furriai is pàginas tocat a umperai is butonis. Diferenti meda est su Kindle Paperwhite, ca tenit unu touch screen chi fait luxi a solu de una manera totu noa chi no fait mali a is ogus: diaici est possibili a ligi in su scuriu sentz’‘e strobai a nemus.
Càralu Mulas
