Ddi nanta “Missio” a sa primu aplicatzioni criada de su sòtziu de is Obras Missionàrias de su Vaticanu, chi fait a scarrigai de iTunes e de Google Play. Gràtzias a custa app fait a ligi is novas e a castiai is bìdius chi tenint s’iscopu de torrai sceda a is fidelis a pitzus de is atividadis de sa crèsia de Arromas.
De custa manera, a pustis de sa bessida in Twitter, chi at betiu a sa cunfessioni catòliga in su de tres millènniu, su Vaticanu bolit sighiri a fai connosci su “fueddu de deus” a milionis e milionis de cristianus in dònnia arrenconi de su mundu.
Meri de custu progetu nou, Andrew Small est, chi, amostendi a su Papa Frantziscu sa app, at nau: “custa aina serbit po fai connosci s’evangèliu a sa genti e a ddu ponni aintru a sa buciaca de is prus giòvanus chi bivint in custu mundu de oi; po agiudai sa genti a castiai a su Criau e a sa Naturalesa cun is ogus de sa fidi”.
Incingiada de su Papa etotu su 17 de maju de ocannu, a s’app dd’at scarrigada genti meda ca fait a dda ligi in su smartphone e in su tablet, e chi dd’anti cuncurdada in parìcias lìnguas puru: ingresu, frantzesu, spanniolu, portoghesu, tedescu, italianu, arrabu e tzinesu.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
