Is bagàntzias de Pasca manna funt s’ocasioni po si fai unu bellu biaxu. Gràtzias a is bolus baratus, oi podeus andai atesu meda sentz’‘e spendi una surra manna de dinai. E intr’‘e is logus chi is pessonis scioberant, anca passai calincuna di’ cun amigus o cun genti de domu, Londras nc’est de seguru.
Sa capitali ingresa, difatis, est una de is tzitadis chi s’at a preni de prus de turistas e biaxadoris in custas diis puru. E sigumenti is cosas de fai e is de biri funt medas dearerus, in cust’artìgulu eus a chistionai de un’amosta chi ant incingiau de pagu in unu de is mellus museus de sa tzitadi britànniga.
Ddi nant David Bowie is a s’amosta stravanada chi ant obertu su 23 martzu anche su Victoria and Albert Museum: un’esibitzioni stravanada a pitzus de su cantadori ingresu famau, allomingiau su Duca biancu. Unu donu chi Londras fait a unu de is artistus prus bravus, chi afestat cinquant’annus de atividadi artìstiga.
S’amosta tenit sa tenta de fai connosci a sa genti sa stòria de David Bowie. Po custa arrexoni ant apariciau su logu cun paperis iscritus a manu, costùminis originalis, màginis e fotografias mai bias, progetus po scenografias e bìdius musigalis. Est a nai chi, po sa primu borta, totus ant a tenni sa possibilidadi de castiai e scruculliai aintru de s’arciu personali de s’artistu.
S’espositzioni, chi est sa primu arretrospetiva intregada a su Duca biancu, at a serrai su 11 de su mes’‘e austu chi benit. In prus, anche sa butega de su museu londinesu, s’agatant librus, discus, posters e trastus de grandu interèssiu po totus is chi stìmant a David Bowie.
Càralu Mulas
