Aura HD ddi nant a su eReader nou de Kobo, chi est arribendi po fintzas in Itàlia. Su ligidori de lìburus litrònigus nou, prodùsiu de sa fràbiga zaponesa-canadesa chi de s’atòngiu passau s’est cojada cun sa Mondadori po bendi eBooks innoi puru, at a costai 169 francus nous.
Imoi is eReader Kobo chi fait a comporai in Itàlia, cuatru funt: su Kobo Touch, su Kobo Mini, su Kobo Glo e, cumenti eus giai nau, su Kobo Aura HD.
S’ùrtimu arribau me in sa famìllia Kobo est lèbiu meda (ca est grai 240 gramus sceti), e tenit unu schermu a 6,8 pòddixis touch screen cun tennologia WXGA, Pearl E-ink e ComfortLight chi ddu faint unu de is mellus eBook Readers chi nci funt in su mercau grobali.
S’acàpiat a s’arretza gràtzias a su Wi-Fi e tenit po fintzas una portixedda USB po ddu assogai a su computer o a sa presa de sa currenti po ddi carrigai sa bateria chi podit durai una mesada. Tres is coloris chi fait a scioberai: de su colori de su café, biancu avòriu e de su colori de s’ossidiana.
Po cantu spetat a is ainas chi serbint po ligi de mellus manera is lìburus litrònigus, custu eReader si donat sa possibilidadi de scioberai intr’‘e dexi caràteris, chi nc’est su Kobo Nockel puru: su stilu gràfiga criau de Kobo etotu.
Aura ligit is eBook chi tenint sa forma de ePub, Mobi e PDF, ma podit ligi po fintzas is dogumentus in TXT, HTML, XHTML e RTF; is fumixeddus cun forma CBZ e CBR; is màginis JPEG, GIF, PNG e TIFF.
Is eReader Kobo s’agatant in is butegas de lìburus de sa Mondadori, e in s’arretza, aundi fait a comporai e scarrigai is eBooks puru.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
