Ddi nanta “State of the Net” a s’atòbiu de is spertus de s’arretza aundi anti chistionau de su liòngiu intr’‘e is italianus e Internet, scruculliendi is donaus arregortus in sa busca de Vincenzo Cosenza.
Cumentzaus a castiai a s’Itàlia e a cumprendi unu pagu mellus cali est sa situatzioni generali. Po cantu spetat a is “infrastruturas”, sa Bota no est amellorendi po nudda ca s’agatat a sa de 26 positzioni po s’arretza cun filu e a sa de 28 po s’arretza sentz’‘e filu. A umperai internet funt, po su prus, is òminis ma su nùmeru de is fèminas est amanniendi dònnia die de prus.
Cali serbìtzius umperant is italianus in s’arretza? Mancu a ddu nai, a sa primu positzioni, Facebook nc’est, sighiu de is atrus “serbìtzius”: Libero, YouTube, Google e su Mèteu. E ita cìrcanta? In su 2013 ant circau, po su prus, argumentus arrelataus a is eletzionis e a Ruzzle, su giogu chi praxit sempri de prus. Po cantu spetat a is “interatzionis”, is italianus s’arrelatant cun su blog de Beppe Grillo, la Repubblica, Lo Zoo di 105, Il fatto quotidiano, e Fanpage.it.
De grandu importu, aintru de custa busca analìtiga, s’acàpiu intr’‘e Twitter e is emotzionis e is sentidus de is italianus. De ita cirolitant is italianus e cali est su naturali insoru? A ligi sa circa, ndi bessit una pintura de unu Paisu, s’Itàlia, a matza bruta.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
