De candu su iPad e is atrus Tablet funt arribaus me in is manus de sa genti, is computer a butonis ant cumentzau a sparessi. In su 2012, po sa primu borta in sa stòria de candu su computer nd’est bessiu a cosa po totus, is bèndidas anti calau. Is de is Tablet, a s’imbressi, crèscint dònnia di’ de prus.
Po cantu spetat a sa crassìfiga de is mellus Tablet chi nci funt a giru oindì, sa J.D. Power and Associates, chi stùdiat su chi is borrochianus pèntzant de is cosas chi ant comporau, no tenit duda peruna: su iPad est su mellus ca sa genti amerigana chi ddu at comporau, ddu iat a comporai torra cras e totu.
Ma poita su iPad est su mellus Tablet chi nc’est in su mercau globali?
Cumentzaus a nai chi su iPad tenit una surra manna de app: calincuna cosa cumenti trexentumila aplicatzionis chi si donant sa possibilidadi de fai unu sciacu mannu de cosas e de umperai de manera stravanada su device de sa Apple. Sentz’‘e si scaresci chi in sa butega birtuali de sa “mela mussiada” s’agatant librus litrònigus, giogus, cantzonis, film e atra cosas puru chi fait a ddas comporai de manera simpli. Ma su iPad no est bonu sceti, ma po fintzas bellu: su design e su sistemu gràfigu praxint a is chi ddu umperant e chi s’agatant beni.
Su segundu Tablet, po cantu spetat sa crassìfiga de is borrochianus soddisfaus, su Kindle Fire est. Custu poita su Tablet Amazon est prus baratu de su iPad ma permitit de fai meda cosas su pròpriu. Sighint is device Samsung, is de sa Acer, is de sa Barnes & Noble e serrat sa crassìfiga su HP.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
