Su 25 de friàrgiu chi benit, at a oberri in Bartzellona su Mobile World Congress 2013, est a nai sa fiera de sa telefonia mòbili prus de importu in totu su mundu.
Nàsciu in su 2009, su MWC est un’atòbiu chi, poi s spertus de tennologia, a ddu perdi no fait. Ca est su logu aundi is fàbricas Hi-Tech amostant a sa genti is prendas litrònigas noas. Est a nai smartphone, device mòbilis e atru puru.
Difatis, su mercau de su smartphone no scit e ita sa crisi siat. In su 2012 anti bèndiu, prus o mancu in totu su mundu, 700 milionis de “telefoneddus sàbius”. Est a nai su 45% in prus de su 2011.
Su meri de custu mercau globali, Samsung est. Ocannu passau, sa fàbriga coreana at bèndiu, prus o mancu, 215 milonis de smartphone: 118% in prus de su 2011. Mancu a ddu nai, s’urrei de custa genia de cosas litrònigas, su Samsung Galaxy III est, chi at bintu po fintzas a su iPhone 5. E no seus chistionendi de is bèndidas sceti.
Difatis, in un’artìgulu bessiu in su magazine Consumer Report, is cumpangias telefònigas americanas ant connotu a su Galaxy III cumente su smartphone prus mellus chi nci fiat in su 2012. Ma su 2012 spaciau est. E, is fàbrigas Hi-Tech de su mundu, prontas funti a si fai sa gherra torra.
Imparis a Samsung e Apple, is protagonistus (cun àterus puru) de Bartzellona ant a essi Sony e BlackBerry. Poita?
Poita ca Sony, chi in custas diis at cumentzau a bendi su Xperia Z in Giaponi, pronta est a conchistai s’Europa puru, cun unu smartphone chi tenit calidadis gràfigas stravanadas.
Po cantu spetat a su BlackBerry, naraus sceti chi “Sa Niedda” in su 2012 pariat morta, ma in su mes’‘e gennàrgiu de ocannu ndi funti torraus a pillu cun su Z10, chi tenit unu sistema operativu de spantu.
Comuncas, po ndi sciri de prus, tocat a abetai su 25 friàrgiu candu, sa capitali cadelana, nd’at a bessiri a capitali mondiali de sa tennologia mòbili puru.
Càralu Mulas
