Giulio Andreotti est stètiu unu de is polìtigus italianus prus de importu in cust’ùrtimu sèculu. Bastat a nai chi est stètiu po seti bortas su presidenti de su consìlliu de is ministrus de sa Repùbriga italiana. Òmini de grandu abilesa in su manìgiu de sa cosa pùbriga, fiat cristianu brulleri puru.
Po chini nid bolit sciri de prus a pitzus de su naturali brulleri e irònigu de Andreotti, podit scarrigai e ligi sa bersioni litròniga in su eReader de Il potere logora ma è meglio non perderlo, su libru autobiogràfigu aundi su polìtigu italianu at arregortu unu sciacu mannu de pensamentus sèrius e brulleris, aforismas e arrexonus a pitzus de sa vida.
Po chini est circhendi unu libru prus sèriu, intzandus podit comporai L’innocenza di Giulio: Andreotti e la mafia, chi est unu sàbiu de Giulio Cavalli chi si contat sa stòria de Andreotti e is arrelatas chi issu teniat cun sa màfia, ca dd’anti fatu ses processus po “acàpius” cun Cosa Nostra.
Sempri a pitzus de sa vida cosa sua nc’est puru Andreotti. La vita di un uomo politico de Massimo Franco. In custu libru, custu puru bell’e prontu in bersioni eBook chi fait a comporai in sa butèga litròniga de sa Amazon, su scriidori arregollit prus o mancu setant’annus de istòria de s’Itàlia ca su de contai sa vida de Giulio Andreotti bolit nai a contai sa stòria de custu paisu puru.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
