Sa primu borta chi s’est postu sa camiseta asula, est a nai sa de sa seletzioni italiana de fùbalu, fiat stètiu in su 1963 cun sa scuadra de is giòvunus. Oi, pustis cincuant’annus Gigi Riva at detzidiu de lassai po sempri su grustu de sa gerèntzia de “is asulus”.
Nàsciu in Leggiuno su 7 de su mes’‘e onniasantu de su 1944, ddu connoscint in dònnia arrenconi de su mundu ca est unu de is giogadoris italianus prus connotus. Gràtzias a is goals suus, su Casteddu fiat arrennèsciu a lompi in Serie A e a binci su scudetu in su 1970.
Tocat a nai puru chi, cun sa “natzionali” at bintu su campionau europeu in su 1968 e est arribada segunda in su mundiali in su 1970. E no est po sorti chi s’arrecurd de goal “asulus” cosa suu est: 35 funti is bòcias postas in s’arretza, in 42 partidas.
“No nci dda fatzu prus” at nau Rombo di tuono, nomìngiu chi ddi iat postu Gianni Brera su giornalista sportivu famau. “Lassu s’asulu a pustis de cincuant’annus e mi ndi andu a pe’ de mìgia”.
A nai sa beridadi, sa gerèntzia de sa scuadra italiana ddu boliat ancoras, a su mancu po duus annus. Ma sa bandera arrùbia-blau at nau ca nou, poita ca is doloris chi tenit no ddi permitint de traballai e bagamundai meda.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
