Su 2012 est stètiu un’annu de grandu trasformatzionis in su mundu de s’imprentadoria. In mesu a is milli e prus nova chi ant torrau is mèdias de totu su mundu, de seguru nc’est cudda de sa serrada de Newsweek chi at lassau su paperi e a su digitali est passau. Est a nai chi imoi su cidali ameriganu no bessit prus in edìculas ma si podit ligi e castiai sceti cun su Tablet o su iPad, su smartphone, su computer. In totu su mundu.
«Su benidori po is giornalis, su eReading est» ant nau Tina Brown e Baba sceti, is dirigidoris de Newsweek. Custu poita ca in Amèriga sa genti còmporat sempri de prus Tablet, eReader e smartphone chi umperant puru po ligi is editzionis digitalis chi no funt a gràtis ma chi tocat a pagai. Po cumprendi unu pagu mellus cust’andatzu, bastat a si ligi su stùdiu de su Pew Research Center chi narat ca in su 2013 is ameriganus chi ant a tenni unu tablet, unu iPad o un’eReader ant a essi prus o mancu setanta milionis. Trexi milionis fiant tres annus fait.
Ma custa no est sceti cosa chi sutzedit in Amèriga sceti. In Inghilterra puru is cosas funt furriendi a sa lestra. E no po is giornalis sceti ma po fintzas po is librus. Amazon.uk at nau chi imoi, po cantu spetat is bèndidas de librus e de eBook online, sa genti còmporat prus librus litrònigus chi no is de paperi.
E s’Itàlia? Is domus imprentadoras itàligas no ant ancoras cumprèndiu su balori de is eBooks e sighint a imprentai unu sciacu mannu de librus de paperi chi no arrennescint a bendi. Ca sa Bota est su paisu oropeu aundi sa genti ligi prus pagu e aundi is librus, carus che fogu funti.
Ma in Itàlia puru s’arrevolutzioni litròniga cumentzat a si fai intendi e su mercau digitali cumentzat a essi unu pagu prus mellus de su chi fiat ocannu passau. Custu perou gràtzias a s’Amazon e a s’Apple chi is meris de su mercau de is eBooks e de is arribistas funt, in Itàlia puru.
E in Sardìnnia? Po imoi is domus imprentadoras traditzionalis chi ant cumprèndiu su balori de su eReading, pagu funt dearerus. Calincuna cosa, perou, si movit po fintzas innoi, po su prus gràtzias a is imprentadoris e a is iscridoris scàpius e prus atrivius. E is librus sardus, po fintzas in lìngua sarda, si pòdint ligi in dònnia arrenconi de su mundu, in su Kindle, in su iPad, in su Kobo o in su Tablet. Ca eReading, custu bolit nai puru.
Càralu Mulas
