A ligi e scruculliai is buscas a pitzus de sa chi totus ddi nanta “arrevolutzioni digitali”, ndi bessit a pillu chi is costùminis de sa genti funt furriendi meda meda. Custu balit puru po su cumèrtziu, poita ca sa genti, ondie, fait sempri prus còmperas on-line.
Giai in cust’ùrtimu Paschixedda is cosas funt stètias diferentis. E nc’est puru chi narat chi su nùmeru de is còmporas in s’arretza s’est amanniau de calincuna cosa cumenti su binti poxentu in un’annu sceti. Nùmerus chi depint crèsciri ancoras de prus ocannu.
Custu gràtzias a is smartphone e a is tablet chi permitint de comporai calichisiat cosa in calichisiat mamentu. In prus, si fintzas a calincunu annu fai is borrochianus internàutas comporànt sceti librus, discus de mùsiga e billetus po biaxai, oi còmporant dònnia stocada ‘e cosa: bestimentas e butinus, computeras e telebisionis, arrelògius e prendas, e aici nendi.
Una “furriada antropològiga” chi donat sa possibilidadi a is prus sàbius de bendi a prètzius bonus a is borrochianus chi funt sempri de prus, dònnia die chi passat. E no seus chistionendi de Paschixedda sceti ma de cada momentu, imoi puru.
Zalando, Amazon, eBay: custus is nòminis prus connotus ma chi no funt is solus a sciri fai business bonu in cust’arrogu de mercau sempri prus de importu po s’economia mondiali.
