Bessit oi, me in is tzìnemas de totu sa Sardìnnia, su film nou de Simoni Contu: Treulababbu ddi nanta. Unu film prodùsiu in s’ìsula nostra chi ddu giògant, po su prus, fèminas e òminis chi anti traballau cument’atoris po sa primu borta. Una faina artìstiga de importu mannu e de grandu bellesa chi si agiudat a castiai su mundu de is mannus cun is ogus de is pipius; una mirada arrica de pantasia treuladora.
A su film, duus contus ddu faint: Sa regula e Su molenti de Oramala. Protagonistus de su primu contu, scritu de Simoni Contu etotu, funti: Maistu Trudu; su fillu de issu, Efis; e Conca Niedda, sa crabitedda ermosa de su pipiu. Unu babu, Maistu Trudu, chi no tenit su coràgiu de nai a su fillu chi Conca Niedda at a essi su màndigu de Paschixedda. E duncas cumentzat a ddi nai fàulas e a fai trassas, fintzas a candu Efis no at a scuberri sa beridadi, incumentzendi a trumbullai su connotu e is arrègulas de is babais.
A su segundu contu, Su molenti de Oramala ddi nanta. Dd’anti scritu Simoni Contu e Bepi Vigna. Una paristòria chi tenit sa trassa de unu contu de foxili, aundi, sa primu protagonista, sa pantasia esti. E imparis a issa: pipus bonus e malus, bècias contadoras de contus antigus, tiàulus cun poderis istravanaus, molenti chi cagant oru, bàrrinus machillotus, e àterus puru.
Duus contus chi biint a is pipius betallendi contr’a su mundu de is mannus. Su primu contu si arregordat chi, a is fillus, mellus est a ddus fai cresci cun is esemprus, e canou cun fueddus sceti, o, peus, cun fàulas e trassas . Su segundu, imbecis, si narat chi sa pantasia, est a nai s’abilesa de pentzai e maginai cosas chi no s’agatant in custu mundu o chi no connosceus, cosa de importu mannu est po is pipius chi crèscinti.
Unu progetu artìstigu, custu de Simoni Contu e de Bepi Vigna, acapiau meda cun sa Sardìnnia ma chi, a nai sa beridadi, cosa noa est in su panorama de su tzìnema sardu e in sardu.
A custu traballu anti pigau parti Rafaedda Baiani po sa scenografia, Frantziscu Veloci po sa mùsiga, David Tommassini in su fraigu de sa pellìcula, Istevània Grilli po cantu spetat a is costùminis e Corradu Serri po sa fotografia.
Cumenti giai nau, su film bessit su 14 de martzu. In sa meria de Casteddu ddu donant anche su tzìnema de bia ‘e Santa Gilla in Casteddu (UCI Cinemas), Le Vele in Cuartùciu (The Space) e su Cineworld de biali ‘e Muristenis (viale Monastir). Ddu donant puru, anche: su Movies Multisala de Santa Giusta (Aristanis); su Multiplex Prato in Nùgoro; su Tzìnema Garibaldi de Tortolì; e su Cine-Teatro Verdi in Tàtari. Po chini ndi bolit sciri de prus a pitzus de su film, nc’est po fintzas su giassu web Treulababbu.it, aundi s’ant a torrai sceda de totu.
Càralu Mulas
