S’àtera di’ in Nova York ant apresentau su Galaxy S4, su top smartphone de Samsung chi cosa stravanada est dearerus: unu “telefoneddu sàbiu” chi tenit unu sciacu mannu de ainas tennològigas chi ddi permitint de essi su solu cumpetidori faci a su iPhone.
Su Galaxy nou, unu display de cincu pòddixis Gorilla Glass III tenit, grussu 7,9 millìmetrus e grai 130 gramus esti. Duas fotocàmeras portat: sa de ananti de 2.1 megapixel e sa de palas de 13 megapixel cun tennologia “dual camera” e “dual recording”. In prus tenit sa funtzioni “drama shot” po tzacai centu fotografias in cuatru segundus.
Sa memòria de aintru podit essi a 16, 32 e 64 GB, ma chi fait a dda amanniai gràtzias a sa scheda SD. Po cantu spetat a sa connetividadi, tenit giai sa possibilidadi de umperai is arretzas 3G e 4G, e de si acapiai a su Wi-Fi. Tenit puru una gennixedda pitichedda a tipu USB po essi assogau a is atrus devices.
Po cantu spetat a is àteras funtzionis tennològigas de su Samsung Galaxy S4, naraus sceti chi tenit sa “S Health” chi permitit a su smartphone coreanu de cuntrullai s’istadu de saludi de is personis e de s’ambienti anca biveus, ca tenit sensoris po s’ùmbidu e sa temperatura. Giai presenti in sa bersioni S3, custa noa ndi bessit ancoras mellus.
At a bessiri in totu s’Europa su mesi chi intrat cun su sistema operativu Android 4.2.2 Jelly Bean. Po cantu spetat a su prètziu, po imoi podeus nai sceti chi at a costai, prus o mancu, 700 èurus. Duas is bersionis chi ant a essi postas in cummèrtziu: sa niedda Black Mist e s’arba White Frost.
Càralu Mulas
