Ocannu is playas sardas chi anti premiau cun sa Bandera Blau funti seti: una in prus de ocannu passau ca sesi fiant. Unu prèmiu de importu poita ca a donai is banderas est sa Federatzioni po s’Educatzioni de s’Ambienti chi nd’at bogau a pillu arrègulas sèrias chi prèmiant is giassus prus lìmpius, amigus de sa naturalesa e chi donant serbìtzius a sa genti.
Nàsciu in su 1987, est duncas unu prèmiu internatzionali chi tenit sa tenta de fai connosci a is personis cali funt is logus aundi is polìtigus funt prus atentus a sa calidadi de sa vida. Su prèmiu tenit puru s’agiudu de s’ONU e de sa Organizatzioni de su Turismu.
A nai sa beridadi, perou, is seti banderas de sa Sardìnnia funt pagu dearerus chi pentzaus chi sa Ligùria nd’at pigau calincuna cosa cumente binti, is Marcas dexotu, is Abrùtzius catordixi, sa Campània trexi, is Pùllias dexi e sa Romànnia otu.
Ma cali funt is logus sardus chi cust’istiu podint fai sbentulai e-d amostai a sa genti sa Bandera Blau? Intzandus, custas funti: su Poetu de Cuartu; is playas Sciumara e Palau bèciu de Palau in Gaddura; La Rena Bianca, sempri in Gaddura, ma a Lungoni (chi imoi ddi nanta Santa Teresa); Punta Tegge e Spalmatore in s’ìsula de La Maddalena; sa de sa Turri (Torre Grande) in Aristanis; Ampùrias de Casteddu Sardu; e, po sa primu borta, is playas de Tortolì chi ddis nanta Baja di Cea e Lido d’Orrì.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
