Sa scoviada dda eus donada nosu etotu in custu giassu: “Amazon bolit oberri una seu in Casteddu”. Fiat su mes’‘e ladàmini de s’annu passau. Nd’iat torrau sceda Davide Fara. Sa nova dda ianta pigada torra totus is giorronalis e is giassus web de sa Sardìnnia e de su Continenti. Po fintzas sa telebisioni e calincunu giorronali de paperi.
A pustis de calincuna mesada totu si fiat citiu. Nisciunu ndi chistionàt prus; e de sa Amazon, sa fràbiga de Jeff Bezos chi est meri de su mundu in su cumèrtziu litrònigu, nemancu unu fueddu. In su giassu chi si podint ligi is propostas de traballu cussu “Amazon Cagliari” ndi beniat sempri a pillu. Po su prus traballadoris po su Call Centre circànt.
In su mentras chi is sardus mandànt curriculum e litras, Amazon sighiat a si fai sempri prus manna e forti, arrennescendi po fintzas a fai su chi, sceti calincun’annu fai, pariat cosa maca: bendi prus eBook chi librus de paperi. No est po nudda, difatis, chi su eReader prus bèndiu, su Kindle esti.
S’atra die, fiat ora, est arribada sa nova chi genti meda, in custa terra disisperada fiat abetendi: Amazon at cumentzau a pigai genti a traballai po donai a is borrochianus italianus is serbìtzius de agiudu. Sesanta personis funti giai traballendi e, a cantu parit, ndi depint pigai atrus centuxincuanta in su 2013. Ma no est totu. Nanta chi, a s’acabu, is traballadoris de sa seu Amazon in Casteddu ant a essi prus de sexentus.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
