Inferru ddi nant a su lìburu nou de Dan Brown, chi at a bessiri in totu su mundu, in Sardìnnia puru, su cuatòrdixi de maju de ocannu. Protagonistu de cust’arromanzu, Robert Langdon torra est, su professori de s’Universidadi de Harvard famau meda. In custa bentura noa, chi sa de cuatru est, su studiau scìpiu de simbologia in Itàlia arribat, po scruculliai e murigai in mesu a is mistèrius stugiaus a intru de sa Divina cumèdia de Dante Alighieri.
“Apu studiau sa Cumèdia – at nau s’autori de Su cundaxi da Vinci – candu femu prus giòvunu e studiamu a s’Universidadi. Ma sceti de pagu apu cumprèndiu su grandu importu de cust’obra po sa cultura de totu su mundu. Po custu apu fatu cust’arromanzu, ca bolemu traigai is ligidoris mius a scoberri custa prenda manna de sa literadura”.
S’arromanzu, chi no ant a mancai mistèrius e àteras cosas stravanadas, e chi at a lassai spantaus is amantiosus de is thriller, fait a ddu pediri e a ddu comporai giai in is mellus butegas de lìburus. Ma Inferno (custu su tìtulu sintzillu de s’obra) at a bessiri po fintzas in bersioni eBook.
Su in lìngua italiana ddu pùbricat sa Mondadori e sa furriadura de s’ingresu est a incuru de Nicoletta Lamberti, Annamaria Raffo e Roberta Scarabelli. Su lìburu de paperi at a costai 25 francus, su eBook Amazon 9,99 francus.
Càralu Mulas
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
