Is spertus no tenint duda peruna: ocannu at a essi s’annu de is tablet e de is eReader, poita ca sa genti s’acostumat sempri de prus a umperai custus device stravanaus. Custu poita ca, no sceti in Amèriga, is borrochianus funti comporendi sempri de prus Tablet e-d eReader chi ddis serbint po fai totu su chi si fait cun is computeras, e in prus po ligi librus e po ligi is editzionis digitalis de is giorronalis. Po cantu spetat a su pòpulu ameriganu, is donaus de unas cantu buscas nanta chi in su 2013 is chi ant a comporai unu tablet o un’eReader ant a essi medas dearerus, arribendi, de custa manera, a calincuna cosa cumenti setanta milionis de device.
Ma cali funt is tablet e is eReader chi praxint de prus a sa genti? De seguru su iPad, chi tenit una meca de “app” e chi sa possibilidadi de fai cosas meda de manera simpli e de scarrigai chena de problemas lìburus litrònigus, giogus, cantzonis, film e atra cosas puru. Ma su iPad no est bonu sceti, ma po fintzas bellu: su design e su sistemu gràfigu praxint a is chi ddu umperant e chi s’agatant beni. Ma puru su Kindle Fire, est a nai su tablet Amazon, praxit meda e no sceti po su fatu de essi prus baratu de su iPad. In Itàlia puru, aundi est arribau po fintzas su Kindle Fire HD 8.9’’, su fradi mannu de is tablet Amazon chi est su prus bèndiu in Amèriga.
Po cantu spetat a is eReader, s’urrei su Kindle est: su ligidori de librus litrònigus prus spainau in su mundu. In Itàlia s’agatant duus modellus: su Kindle classic e su Kindle Paperwhite. Ma puru sa famìllia de eReader Kobo praxit meda in custu paisu puru, aundi si podint comporai cuatru modellus: su Kobo Touch, su Kobo Mini, su Kobo Glo e su Kobo Aura HD.
Progetu realizadu cun sa partetzipatzione de sa Regione Autonoma De Sardigna L.R. 26/97 subra sa limba e sa cultura sarda
