Is Bàrdias de sa costera ant dèpiu sarvai a unu marineri portoghesu de 69 annus chi fiat traballendi in una navi de cruxeras. A s’òmini dd’ant arrecoverau de pressi in s’arrepartu de is silurgianus de su spidali “Brotzu” de Casteddu. Est acontèssiu ariseru de a mengianu, faci a is noi oras, candu su cumandanti de sa Artania, sa navi de is ìsulas Bermudas chi de Malta fiat andendi a Marsìllia, at tzerriau agitòriu ca su marineri iat tentu un’embolia a sa camba de manca. Aici su motoscafu de is bàrdias, imparis a is dotoris e a is infermieris de su 118, est dèpia partiri de pressi po lompi anche sa navi, chi s’agatàt a 56 mìllias a NO de Aristanis. Duncas, a s’òmini dd’ant portau a terra e de pressi, cun s’elicòteru, fintzas a su spidali de Casteddu.
Lòiri: sparèssiu un’òmini, cumentzat sa busca
Bainzu Làcana, unu pitzajolu de 35 annus de Lòiri, est sparèssiu e de sàbadu niscunu ndi scit prus…
