No est sa primu borta chi incapitat, ca giai in passau unus cantu de librus de scola, de giornalis e de rivistas si ndi fiant scarèscius de dda ponni me is mapas geogràficas. Ma custa borta, a si ndi scaresci sa Sardìnnia, funt stètius Spin Master e Editrice Giochi chi imprentant e bendint in su mercau de is giogus de mesa, Risiko, su prus famau de strategia chi in Itàlia puru tenit unus cantu de amantiosus.
Me is ùrtimas cidas difatis, in is giassus de cummèrtziu in linia, ant postu a bendi s’editzioni noa de su giogu. Una versione diferenti, a partirti de sa forma chi immoi est cuadrada, de is coloris, meda prus biatzus, e de sa gràfica prus moderna . E pròpiu custas fainas de annoadura ant portau unus cantu de faddinas faendi inchietai fintzas is giogadoris prus animaus. Is primus faddinas funt in contu de is Stadus Unius ca bastat un’ograda po si nd’acatai lueguetotu chi is làcanas de s’Amèrica tzentrali, a diferèntzia de is versionis de prima de su giogu, no funt prus a oru cun s’Amèrica orientali.
A cantu narant is prus spertus de su giogu nci funt àteras cosas chi no torrant comenti calchi arrègula de su giogu e sa spainadura de s’Antardidi. Ma po is giogadoris sardus de Risiko, sa cosa chi no ant pòtziu fai de mancu de biri, est chi in su tabelloni ammancat sa Sardìnnia. No parit berus ma est aici! Nudda Sardìnnia. Castiendi faci a s’Europa e a s’Itàlia, contrassegnate de sos costumados colores intre su fuxia e lu vìolat, si bidet sa Sitzìlia ma de sa Sardigna perunu rastru.
