Est lòmpia in custas diis sa nova chi su sardu est intrau in manera ufitziali in su Cuntratu de Servìtziu Rai- Guvernu. Difatis sa Presidèntzia de su Consillu de is Ministrus- Dipartimentu s po s’informatzioni e s’editoria e sa Rai, Ràdiu Televisioni Italiana, ant firmau sa cunventzioni po mori de unu cunfrontu fitianu cun su Guvernu e cun s’Azienda chi su guvernadori de sa Sardìnnia Christian Solinas at mandu a innantis de s’inghitzu de sa Legisladura sua cun sa tarea de donai amparu a sa lìngua sarda. Su sardu at a fai parti duncas de sa programmatzioni de sa Rai a partiri de custu atòngiu cun programmas chi ant a pertocai cultura, informatzioni e aprofundimentus de literadura, arti, etnografia. Custu est unu bisu chi po 21 annus at acumpàngiu is sardus chi creint in sa lìngua insoru e chi si funt donaus de fai po lompi a custu arresurtau, de candu sa lei 482 po sa tutela de is lìnguas de minoria dd’iat prevìdiu in su 1999.
S’acòrdiu po ocannu at a assegurai 100 oras po sa programmatzioni radiofònica e 22 oras po sa programmatzioni televisiva. “Su portai su sardu in sa Rai, cun totu is espressionis diferentis chi tenit- at nau su guvernadori Solinas- est una cunchista de primori chi arrapresentat un’arreconnoscimentu mannu a su valori e a sa dignidadi de s’identidadi culturali nosta”. Fintzas su Presidenti de sa Rai Marcello Foa at nau chi “s’Azienda est abarrada cuntenta meda e chi at a essi una satisfatzioni a acolli su sardu me is trasmissionis insoru sendi chi sa Rai est impenniada de meda a promovi sa spainadura de totu is formas de cultura e identidadi de su pòpulu italianu”.
S’amministradori delegau de sa Rai Fabrizio Salini at nau ichi “in sa Regioni Sardìnnia ant agatau unu negossiadori atensionau, chi funt prexaus de cumpartiziri s’incingiadura de custu progetu e chi s’Azienda est pronta po ammanniai s’oferta sua e essi sèmpiri prus acanta a is tzitadinus”. Su progetu dd’at a sighiri e averiguai in totu is fasis de traballu unu Comitau formau de Guvernu, Regioni e Rai. Totu su mundu de is operadoris e de is amantiosus de su sardu at agradèssiu custa nova e càstiat a su benidori cun sa spera chi custu siat unu sinniali forti chi potzat donai vida diaderus a unu tempus nou po sa lìngua nosta in dònnia setori de sa sotziedadi.
Manuela Ennas
