In custas ùrtimas diis funt lòmpias de su Vaticanu novas chi de seguru ant a lassai un’arrastu de importu: Papa Frantziscu at aboliu su secretu pontifìtziu candu ddoi siat aprofitamentu sessuali e abusus apitzus de minoris. Is documentus funt duus. In su primu su segretàriu de Stadu, Pietro Parolin, si fait sciri chi su Papa, su 4 de mesi de Idas passau, at stabiliu de aboliri su secretu pontifìtziu po denùntzias, protzessus, e dispositzionis chi pertocant is malifatas arremonadas in su primu artìculu de su motu proprio ‘Vos aestis lux mundi’, bolit nai po totu is bortas de aprofitamentu sessuali e porcarias fatus cun sa fortza e contras a sa voluntadi, abusus apitzus de minoris e personas cun disabilidadi, e candu is sciortadoris no bèngiant denuntziaus de is pìscamus o de àteras figuras religiosas.
Sa tarea duncas est sa de smenguai su secretu pontifìtziu a secretu de ufìtziu, donendi inditus pretzisus de comenti si cumportai in situatzionis deaici, innui tocat a tenni in contu is doveris moralis de sa secretesa. Acapiau a su primu, su segundu documentu de su Papa pertocat is normas apitzus de is “delicta graviora” bolit nai is peus malifatas, comenti sa pedofilia e sa pedopornografia. Custu documentu narat chi, si fintzas a immoi, in custas causas su ruolu de abogau ddu depiat tenni unu preidi, de immoi a innantis podit essi fintzas unu làicu chi tèngiat perou is recuisitus stabilius de s’ordinamentu de sa Crèsia.
In prus, un’àteru elementu de importu est chi su documentu àrztiat de 14 a 18 annus s’edadi de is vìtimas, comenti recuisitu po sestai su reatu de pedopornografia. Custas detzisionis de Papa Frantziscu arrapresentant una furriada funguda in su contestu de s’istitutu giurìdicu de su secretu pontifìtziu e funt sceberus chi sighint s’àndala de is tempus nostus, donendi atentu a una sotziedadi sèmpiri prus ferta de custus problemas.
Manuela Ennas
