Su Nascimentu de Para Larentu. De prus de 70 annus su miràculu de Paschixedda

In Sardìnnia puru Su Nascimentu de Paschixedda est una de is prus arrapresentatzionis sacras apretziadas chi teneus. Su Nascimentu tenit una stòria longa nàscia po mori de Santu Frantziscu de Assisi. Issu, nàsciu in Assisi in su 1181, nd’iat pesau sa primu scola de paras frantziscanus, una cumpangia chi sighiat su valori de sa poburesa. In su 1223 s’agatàt in sa bidda de Greccio, malàdiu e giai imbeciau, e iat bòfiu circai de bivi s’emotzioni de su Nascimentu de Gesùs impari a is paras de sa cumpangia sua e a sa genti de su logu. In sa noti intra de su 24 e su 25 de mesi de Idas de su 1223 iant postu una mandiadroxa cun palla che a bratzolu e ingunis acanta unu boi e a unu molenteddu: ddoi fiat aproliada genti de is biddas a ingìriu po sa crosidadi e po festai totus impari sa Paschixedda. A Frantziscu custa bidea ddi fiat benida a conca in su 1219 candu s’agatàt in Terrasanta po Paschixedda ma no fiat arrennèsciu a lompi a Bethlehem. Est de insandus chi su Nascimantu est intrau in su connotu de totu sa comunidadi de religioni cristiana.

E in su connotu e in su coru de is sardus puru. Intra de is prus Nascimentus famaus in Sardìnnia no podeus fai de mancu de arremonai su de is paras Capucinus in Casteddu acanta a sa crèsia e a su guventu de Santu Nàssiu de Làconi. Unu Nascimentu chi Para Larentu Pinna, originàriu de Sàrdara, iat cumentzau a cuncordai in su 1948 cun sa tarea de fai acostai de prus sa genti a su misteru de Paschixedda. Candu calchi annu prus a tardu dd’iat biu para Nicolau de Gèsturi, contant chi si fiat cummòviu e cun is làmbrigas a is ogus si fiat postu a cantai “Tu scendi dalle Stelle” cun su prexu e s’emotzioni de unu pipieddu.

In Casteddu dd’ant sèmpiri connotu comenti “Su Nascimentu Biventi” ma biventi no est. Postu aìnturu de un’aposentu a su scuru e mannu cincu metrus po cuàturu, est mecànicu e si movit. Bolant is pillonis, is prammas tremint po su bentu, is personàgius faint is fainas insoru, is brebeis papant, su fogu est allutu, s’àcua currit in su flùmini, su soli lassat logu a sa noti stellada, in sa gruta de ortigu Maria annìnniat su Bambinu. Sa cosa chi fait spantu est chi custu Nascimentu fueddat, cun una boxi seràfica arregistrada capassa de fai torrai a bivi is prus sentidus fungudus de Paschixedda contendi sa nàscida de Gesùs.

Me is ùrtimus annus puru cun boxis, sonus e luxis prus modernas ca imperant ainas tènnicas comenti su videuproietori cun dvd. Dònnia annu fait a ddu bisitai po totu su mesi de Idas e finsas a metadi de su mesi de Gennàrgiu, ma ocannu is paras po nexi de su Covid ant sceberau de no dd’aberri po straviai s’impestu ma privendi totu is amentiosus de custa bellesa. E duncas si tocat a sperai po s’annu chi benit.

Manuela Ennas

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share