Is diis de sa meurra, est a nai is ùrtimas tres de su mesi de gennàrgiu, narant chi siant is prus fridas de s’ierru. In Itàlia custu nòmini est acapiau a una paristòria. Si contat difatis chi sa meurra, in tempus antigus, portàt sa pinna totu bianca che sa nii. Dònnia annu gennàrgiu ddi faiat su crepa crepa e abetàt a candu ndi fessit bessida a foras de su niu, po circai cosa de papai, po nci ghetai a terra nii, cilixia e frius meda.
Un’ annu perou sa meurra, arròscia de cussas trassas, iat detzìdiu de allogai cosa de papai bastanti asumancu po unu mesi e fiat abarrada cuada, chena de bessiri nudda, po totu su mesi de gennàrgiu chi insaras teniat 28 diis sceti. S’ùrtima dii, sendi chi fiat acabbau su mesi, ndi fiat bessida sigura chi no nci fessit prus perìgulu e si fiat posta a cantai faendi issa su crepa crepa a gennàrgiu, Issu perou si fiat arrennegau meda e iat pediu a su fradi Friàrgiu de fai su praxeri de dd’imprestai tres diis. Aici in cussas tres diis iat fatu frius e cilixia e nii prus de is àterus annus.
Sa meurra insaras, po no si morri de frius e abarrai in su callenti, si fiat acuguciada beni beni aìtntru de unu fumajolu de una ziminera e fiat abarrada inguni po tre diis. Candu ndi fiat bessida, sa pinna sua no fiat prus bianca ma niedda che sa pixi e su contu narat chi no dd’est prus torrada comenti fiat. In totu is regionis de Itàlia nci funt paristòrias diferentis chi pertocant custas diis e in Sardìnnia ddis naraus ‘diis imprestadas‘. Su contu narat chi iat fatu unu gennàrgiu giai giai beranili e unu pastori giovuneddu si fiat bantau de ai pòtziu pasci beni is brebeis po totu su mesi. Ma Gennàrgiu, cun cussu naturali tremposu chi teniat, si dda fiat pigada e iat preguntau a friàrgiu de dd’imprestai tres diis po donai unu castigu a su pastori. Aici dd’iat spèrdiu totu is brebeis cun frius e nii. Sceti una si ndi fiat sarvada ca si fiat cuada asuta de unu casiddu po fai su casu. De insaras est chi gennàrgiu tenit 31 diis e friàrgiu 28 sceti. In Sardìnnia is diis imprestadas serbint puru a cumprendi comenti at a essi su beranu: si funt fridas meda su beranu at a lompi a lestru e at a essi caldumu, invècias chi funt diis bellas su beranu at a essi fridu e at a trigai a lompi.
Manuela Ennas