Est de prus de 10 annus chi sa chistioni de otenni unu domìniu de prima sardu po Internet est bessida a pillu bortas meda, ma in su mentris chi in àterus logus de Europa comunidadis chi tenint diferèntzias culturalis, linguìsticas, geogràficas o econòmicas, comenti is de sa Catalùnnia, de sa Britànnia, de sa Còrsica e de sa Frìsia sceti po ndi arremonai calincuna, funt arrennèscias a dd’otenni, sa Sardìnnia est abarrada agoa e ancora no nci dd’at fata. Sa Sardìnnia no est unu stadu, duncas no podit preguntai de ddi fai unu ccTld (country code top-level domain, unu domìniu a duas lìteras, che su .it o .fr) e dd’iat a tocai a s’acuntentai de unu gTdl (generic top-level domain, unu domìniu de prima cun 3 lìteras o prus, che su .cat), una genia de domìniu chi Icann (s’autoridadi chi manixat is nòminis de domìnius de prima) donat a is comunidadis cun interessus culturalis, geogràficus o econòmicus ladinus.
E duncas, sigomenti ca .srd est su còdixi oficiali a tres lìteras de sa lìngua sarda (Iso 639-2 e Iso 639-3) no est stètiu difìtzili a ddu sceberai. Is catalanus puru ant fatu aici cun su .cat. Su de tenni unu domìniu .srd iat a essi profetosu po sa lìngua sarda comenti inditat s’impreu chi ndi funt faendi is àteras minorias linguìsticas chi ddu tenint giai. Ma iat a essi de importu puru po su chi pertocat s’economia, sendi chi fintzas a immoi is atividadis nostas s’gatant in internet po mori de is domìnius .it, .com, .net,.biz e .org e naraus chi funt ammesturadas a totu is àteras chena de podi ammostai luegu una diferèntzia capassa de portai unu compradori a sceberai su mercau sardu in deretura.
A nai sa beridadi est giai de su mesi de maju de su 2015 chi fait a ponni sa firma a una petitzioni po preguntai a Icann de apariciai su domìniu .srd po sa Sardìnnia. A aberri custa regorta de firmas est stètiu Andrea Maccis, unu piciocu de Pabillonis, amantiosu de su sardu e de is chistionis econòmicas e sotzialis de is pòpulus de minoria. Ma a oi, a pustis de custus cincu annus, funt sceti 4.666 is chi ant firmau. In Bretànnia, po nai, po su domìniu .bzh, iant bòddiu sa bellesa de 10.000 firmas sceti in tre mesis. . In su 2017, cun unu emendamentu bòfiu de su consilleri regionali Pàulu Zedda, sa Lei Finantziària de sa Regioni iat postu a curri 20.000 èurus po incarrerai una circa in contu de profetu o dannus chi iat a portai su domìniu .srd a is atividadis e prus in generali a sa Sardìnnia.
In su mesi de Idas de su matessi annu cun sa deliberatzioni 55/16 sa RAS si fiat pigada s’impìnniu de ndi pesai su .srd Ma de insaras est ancora totu firmu e no si nd’est scìpiu prus nudda. Ita est chi no at funtzionau? De seguru a firmai no bastat. Sa petitzioni est sceti su primu tretu e tocat a ndi sighiri a fueddai e a fai connosci a totus sa tarea e s’importu de tenni su domìniu .srd po is sardus. Sceti aici at a fai a boddiri àteras firmas, cumpartzendi puru sa cosa cun is trastos digitalis e me is arretzas sotzalis cun su hashtag #puntuSrd.
Impari a sa petitzioni (chi fait a firmai sighendi custu ligàmini https://www.change.org/p/srd-puntusrd-un-dominio-per-la-sardegna-unu-dom%C3%ACniu-po-sa-sard%C3%ACnnia-a-domain-for-sardinia ) est craru chi tocat a ponni in campu unus cantu de àteras fainas puru chi podint essi de agiudu a sa chistioni comenti su fai publicidadi in dònnia logu, ammaniai su cunsensu po su .srd cun un’arretza de informatzioni prus funguda, fai a manera chi is polìticus puru pighint parti a su progetu e ammostai a Icann chi esistit diaderus, a palas de .srd, una comunidadi chi punnat a ddoi lompi cun totu is sentidus, ca tocat a essi sardus no sceti a fueddus.
Manuela Ennas
