Sebastianu Satta fiat nàsciu in Nùgoro su 21 de maju de su 1867. Fillu de s’abogau nugòresu Antonio Satta e de Raimonda Gungui, iat studiau in Nùgoro fintzas a su ginnàsiu, invècias is ùrtimus tres annus de su liceu ddus iat fatus in Tàtari e aici puru s’Universidadi, in sa facoltadi de Lei, pighendi sa làurea in su 1894 a 27 annus. In pagu tempus fiat diventau, comenti su babbu etotu, un’abogau famau e stimau meda in Nùgoro. Su sordau dd’iat fatu in Bolònnia innui iat tentu sa possibilidadi de s’acostai a sa poesia de Carducci, chi at in carchi manera influiu in sa poètica cosa sua. Candu fiat torrau in Sardìnnia, in Tàtari, iat incarrerau a fai su giornalista traballendi po cuotidianus, periòdicus e revistas. Impari cun Gastone Chiesi iat donau vida a su cuotidianu ‘L’Isola’.
Torrau in Nùgoro iat sighiu a fai s’abogau penalista, ma chena de arrenuntziai a sa passioni, chi teniat giai de giovaneddu, de scriri poesias ispiradas mescamenti a sa vida de su pòpulu de sa Barbàgia. In su 1908 ddi fiat calada una una guta – nant po nexi de su botulinu – chi dd’iat ammarturau totu sa parti dereta de su corpus. De insaras no nc’arrennesciat prus a chistionai ma is falcoltadis mentalis ddi fiant abarradas sanas permitendi-ddi de si dedicai a scriri poesias, in lìngua sarda e in lìngua italiana.
Satta no at tentu fama manna in sa literadura italiana e a dolu mannu pagu dd’arremonant in is lìburus de scola. Perou est unu de is prus mannus de Sardìnnia ca est stètiu unu cantori amantiosu de sa terra sua, de sa cultura e de sa lìngua e unu connoscidori atentu de sa realidadi sotziali sarda.
In sardu at scritu unus cantu de poesias, fortzis sa prus connota est ‘Su battizzu’, ca dda cantat, tra is àterus, su Coro de Nùgoro. Is nugoresus funt meda acapiaus a Satta e dd’arregordant pruschetotu po sa manera sua de abarrai acanta a is prus ùmilis e sa capacidadi de aguantai is problemas, scerendi vìtzius e virtudis, de su pòpulu suu. Sa poesia sua est arrica de umanidadi, prena de sentidus caridadosus e a dda movi est una cuscièntzia sotziali funguda e capassa de analisis sintzillas. Is mellus lìricas suas funt arregortas in Versi Ribelli (1893), in Canti barbaricini (1910) e in Canti del salto e della tanca e Canti della culla, is ùrtimus duus imprentaus a pustis de sa morti.
Una parti de sa literadura sarda intra s’acabu de s’Otuxentus e s’inghitzu de su Noixentus at pertocau sa chistioni de su banditismu, donendi-ddi perou una bisura romàntica prus chi stòrica e antropològica, bastat a pensai a is romanzus de sa Deledda. Su bandiu est un’arrabellu chi si fùrriat contras a is leis de unu Stadu chi pretendit sceti chi ddi paghint is tributus ma chi lassat a sola sa genti a s’ora de s’abbisòngiu. Seabastianu Satta puru at scritu de bandius, giai giai cun bonucoru, comenti de òminis afligius, castigaus de Deus, obrigaus a bivi a solus e atesu de sa bidda, de sa famìllia e de is afetus insoru. Cun piedadi manna su poeta parit intendi sa tristura de custa genia de òminis malassortaus, privaus de su prexu de una vida normali.
Issu intrat in su coru insoru e si fait cumprendi chi no est de perda comenti iat a podi parri ma est prenu de arregordus durcis allingongiaus a sa famìllia, a sa pipiesa, a is festas e a is traditzionis, totu cosa chi ant lassau po sighiri sa libertadi, o mellus po no dda perdi. A pitzus de Seabastianu Satta, chi s’est mortu pròpiu su 29 de donniasantu de su 1914, nc’iat a essi meda cosa de contai e po chini ndi bollat sciri de prus mi permitu de cunsillai su giassu internet https://sebastianosatta.org/ chi arregollit unu cantus materialis po connosci mellus custa fìgura, fortzis sa primu chi is sardus e totu su mundu ant arreconnotu comenti icona de sa Sardìnnia.
Manuela Ennas
