Naschet in su Lidu de S’Alighera una plaja in ue, pro is isentos, est prus fàtzile a bi intrare. Sa plaja in chistione, a nàrrere sa beridade, est aberta a totu is chi bi cherent andare, ma at a tènnere una frunidura de pontigras istudiada a posta pro èssere de agiudu a chi nde tenet bisòngiu. S’impreu de custas pontigras at a pertmìtere de si mòvere chena de dificurtades e lòmpere in totu is logos acurtzu de sa plaja.
A cantu paret custa no at a èssere s’ùnica zona achipagiada cun pontigras, ca in is intentos de s’amministratzione comunale ddoe sunt difatis unos cantos progetos de ammanitzu che a custu pro aciùngere fintzas àteros servìtzios utilosos. De custas pontigras de intrada nd’ant a pònnere puru a Fertìlia e in àteros tretos de sa costera. In su mentres ant a sighire puru, a incuru de s’assessoradu a sa manutentzione, is traballos pro torrare a nou is pontrigras de linna chi dae su padente de opinos de Maria Pia giughent a sa plaja. Difatis in zonas medas de sa costera no est fàtzile a ddoe arribare e gasi is tzitadinos e is istràngios chi sunt in fèrias e chi tenent dificurtade de moghimentu, pro mèdiu de is pontigras no ant a agatare prus cosas fatas o postas de traessu in su tretu chi seberant de fàghere. Is assessores de cumpetèntzia ant acraridu chi a pustis de annos in ue est mancadu s’atentu pro custa chistione S’Alighera immoe est incumentzende a si frunire de ainas che custa e a s’atratzare de totus cussos servìtzios netzessàrios pro chi fatzat a gosare de totu is areniles e de totu su chi sa tzitade bolet donare. Cun sa publicatzione de sa delìbera de sa giunta de su 24 làmpadas coladu, subra proposta de is assessorados a s’ambiente, a is servìtzios sotziales e a sa manutenztione de sa Comuna de S’Alighera, si cheret assegurare s’intrada e sa pàsida a persones cun disabilidade e sa possibilidade de pigare su sole, de intrare a mare e leare parte a fainas chi donant recreu.
A dolu mannu non semper est simple agatare plajas achipagiadas pro isentos e aparagulare unu logu pro is fèrias pro chi tenet problemas motòrios. Nointames cada annu su nùmeru de is istabilimentos privados e de is plajas pùblicas, chi dotant is istruturas insoru de su chi serbit pro ddoe intrare in manera fàtzile, siant semper de prus, su paisu nostru tenet ancora cosa meda de megiorare. Duncas tocat a tènnere in contu fainas comente sa de S’Alighera, chi mustrat sensibilidade e rispetu mannos e mirat a una sotziedade inclusiva chi acollit a totus chena de fàghere diferèntzias.
Manuela Ennas
