Sa primu borta chi is fèminas ant votau

Custa cida sigheus a fueddai de fèminas ca est pròpiu a dì de oi chi ant votau in Itàlia po sa primu borta. Su votu de is fèminas podit parri una cosa normali de dònnia logu tzivili ma no est aici in logus medas de su mundu. Sa cosa no s’iat a depi spantai meda ca po s’Itàlia puru est una conchista de pagu tempus. Una conchista arribada pustis de una batalla longa candu àterus stadus europeus e is Stadus Unius de Amèrica dd’iant giai achirida de meda. Su movimentu po su deretu de votu de is fèminas fiat nàsciu in Itàlia puru a s’acabbu de s’Otuxentus , sighendi s’esèmpiu de movimentus giai famaus comenti su de is Sufragette in su Rènniu Uniu e in is Stadus Unius.

In contu de Suffragette mi fait praxeri a arregordai una pellìcula de importu de su2015 chi chi tenit pròpriu custu tìtulu. Sa pellìcula, cun sa regia de Sarah Gavron e cun is atoras Carey Mulligan, Meryl Streep e Helena Bonham Carter, contat, movendi de sa stòria de Maud Watts, is fainas de una truma de fèminas britànnicas chi a s’inghitzu de su Noixentus cumbatiant custa batalla preguntendi a su Parlamentu su deretu a su votu, deretu chi at a lompi ingunis po totu is fèminas cun 21 annus fatus in su 1928.

Est pruschetotu cun sa Primu Gherra Manna chi in s’opinioni pùbrica inghitzat a si spaniai un’atentu prus mannu po su deretu de votu de is fèminas. Difatis, in su mentris chi is òminis fiant atesu po cumbati, giòvanus e prus pagu giòvanus ca sa majoria ddus iant torraus a tzerriai a is armas, is fèminas ddus arremprasant in su traballu, finas in is fàbricas, ammanniendi su rolu insoru aìnturu de sa famìllia e duncas in sa sotziedadi.

Deaici, a s’incràs de sa Gherra Manna Emanuele Modigliani, unu deputau de àrea sotzialista, presentat una proposta de lei cun sa tarea de arreconnosci a is fèminas su deretu de votu. Ma su 1922 a dolu mannu est un’annu malu po is deretus e sa stòria nosta. Is fascistas faint sa màrcia conca a Roma e si ndi liant su poderi, faendi calai su mudìmini asuba de custa chistioni e de meda àteras.

Chi in Germània is fèminas otenint su deretu de votu indiritura in su 1919, in is Stadus Unius in su 1920 e in su Rènniu Uniu in su 1928, is italianas depint abetai s’acabbu de su fascismu e de sa Segunda Gherra Mundiali po nci torrai a ponni manu. Est in una natzioni noa, chi punnat a sa rinàscida e a su progressu, chi su deretu finementi benit arreconnotu e is fèminas podint andai a votai po espressai is sceberus e is sentidus insoru. .Costituiu su Guvernu de Liberatzioni Natzionali is fèminas si donant de fai po intrai in s’eletorau. Sa primu rechesta de su mesi de ladàmini de su 1944 dda presentat sa Commissioni po su votu de is fèminas de s’UnioniFèminas Italianas, chi a pustis at a taballai puru po otenni, in prus de su deretu de votu, su deretu a s’elegibilidadi.

Est su primu de freàrgiu  de su 1945 chi su Consillu de is Ministrus, gihiau de Ivanoe Bonomi arreconnòsccit su deretu de votu a is fèminas cun unu decretu legislativu chi acolliat sa proposta presentada de Palmiro Togliatti e Alcide de De Gasperi. Su 10 de martzu de su 1946 duncas is fèminas votant po sa primu borta po is eletzionis amministrativas in giai 436 comunus. Est unu plebiscitu, ca andat a votai prus de su 89 po centu de is fèminas. Pustis de pagu tempus, su duus de mesi de làmpadas, ant a torrai a votai po una cosa prus de importu, su referendum istitutzionali po sceberai intra de Repùbrica e Monarchia e po eligi s’Assemblea Costituenti  Sèmpiri su 10 de martzu un’àteru decretu arreconnòsciit a is fèminas puru su deretu de essi candidadas a is eletzionis e duncas de essi votadas. Difatis ant a essi 21 is fèminas elìgias in s’Assemblea Costituenti, intra de is 226 candidas.

Manuela Ennas

[Foto: colletiva.it]

Atividade realizada cun su contributu de sa Regione Sardigna – IMPRENTAS 2020-2021.
LR 22/2018, art. 22
Attività realizzata col contributo della Regione Sardegna – IMPRENTAS 2020-2021.
LR 22/2018, art. 22

Diventa anche tu sostenitore di SardiniaPost.it

Care lettrici e cari lettori,
Sardinia Post è sempre stato un giornale gratuito. E lo sarà anche in futuro. Non smetteremo di raccontare quello che gli altri non dicono e non scrivono. E lo faremo sempre sette giorni su sette, nella maniera più accurata possibile. Oggi più che mai il vostro supporto è prezioso per garantire un giornalismo di qualità, di inchiesta e di denuncia. Un giornalismo libero da censure.

Per ricevere gli aggiornamenti di Sardiniapost nella tua casella di posta inserisci la tua e-mail nel box qui sotto:

Related Posts
Total
0
Share